Tsi xob sis nrauj...

User Rating:  / 1

Lawv le tej ntaub ntawv soj ntsuam txug kev sis nrauj ntawm cov khub namtxiv nyob rua lub tebchaws Ameskas nuav mas 50 feem pua ntawm cov sis yuav puavleej sis nrauj taag huvsi. Thaus u peb Hmoob lub neej yuav laug tsi nov muaj puj nrauj hab yawm nrauj. Nwg nuav txujkev sis nrauj nuav cale dlhau lug ua ib tug mob cancer kws kis lug txug kuv hab koj. Tsi taag le ntawd xwb, cale dlhau lug ua peb cov ntseeg ib tug mob kws peb tsi pum qaab yuav khu tau le caag. Kuv xaam pum has tas Nwg nuav qhov teebmeem kws lug raug rua peb tsev tuabneeg tsi yog has tsi tau peb tej mivnyuas tabsis yog yug ob namtxiv ib leeg rov has tsi tau ib leeg lawm. Yog vim le caag peb cov ntseeg Tswv Yexus lawm los tseem muaj kev sis nrauj?

• Vim peb lub neej tsi muaj Tswv Yexus tag tag
• Vim peb tsi muaj kev ncaaj nceeg
• Vim peb tsi muaj kev hlub
• Vim peb tsi muaj kev zaam txim
• Vim tuabneeg lub sab txujkev ntshaw

Cov hluas ces xaam has tas puab tseem hluas tsi tau paub lub neej, tabsis nwg nuav peb ib txha tub yog nam yog txiv rua peb cov mivnyuas, tub yog puj yog yawm, hab tub yog puj koob yawm koob rua peb tej xeebntxwv los ib txha cale sis nrauj ua lub neej puamtsuaj taag. Cov ib nraab neej lawm los tseem ntshaw ntshaw ua lub neej hluas, tsi paub txaaj muag rua tej tub tej nyaab, tej ntxhais tej vauv hab tej xeeb ntxwv hlo le. Xaav xaav mas txaus tu sab kawg. Txawm zoo le caag los xij peem, tug ua tau dlhau lawm los ntshe mej cale twg kev tsi paub ua mej lub neej zoo le caag, yuav tau txaav rov qaab lug cuag Vaajtswv hab thov Vaajtswv zaam mej tej kev txhum, tabsis cov kws tseem muaj txwj muaj nkawm Vaajtswv txujlug has nyob huv Mathais 19:6 qha has tas, “Ob tug tsi yog ob leeg lawm, tabsis yog ib leeg xwb. Vaajtswv tub muab obtug lug txis ua txwj ua nkawm lawm, yog le ntawm tuabneeg tsi xob muab obtug cais.” Tsimnyog peb yuav tau lug saib txujkev ua txwjnkawm nuav kuas muaj nuj nqes tag. Kuas meb ncu hastas kev sis nrauj:

• Tsi yog Vaajtswv tug dlejsab rua meb lub neej. Malakis 2:16 has tas Vaajtswv ntxub txujkev sis nrauj heev.
• Ua rua meb poob nyaj ntau. Kev sis nrauj tsi yog free. Meb los yeej yuav poob sijhawm, poob nyaj ntau lug has meb tej plaub. Nom tswv yuav txav meb tej nyaj txag lug yug meb tej mivnyuas. Ib txha cale ua tsi taug dlejnum hab thaus kawg yug rov lob nrhaab rua yug ris xwb.
• Ua rua meb ntsib kev nyuajsab. Tsi muaj ib khub namtxiv twg kws sis nrauj lawm es yuav tau lub neej kaajsab. Tseeb tag, kheev laam yog meb xob muaj nam muaj txiv, muaj tub muaj ki, muaj kwv muaj tij, muaj neej muaj tsaav, hab muaj phooj muaj ywg ces meb yuav ua le caag los tau. Meb txawm muaj lub neej dlua tshab los lub cos plav yeej tseem nyob ntawm npug tsi tau ca, zoo le tug tsaj kws tuag lawm tabsis pheej tsi tau tu sav.
• Ua rua meb tej mivnyuas tsi muaj lub chaw ca sab. Coob tug mivnyuas hlwb puag vim tsi muaj nam muaj txiv lug plhw hab tuav. Coob tug mivnyuas tsi muaj chaw nyob vim puab tsi muaj nam muaj txiv lug ua lub chaw khov. Coob tug mivnyuas ua dlog ua dlig vim puab tsi muaj nam muaj txiv lug ua lub chaw tiv. Tej mivnyuas tsi muaj cai has dlaabtsi rua meb ua nam ua txiv, tabsis xaav tuab quas zoo has tas puab nyob puab los puab lub sab yeej txawj quaj quas dlhi. Thov meb xob sis nrauj nawb mog……..

By: Kx. Num Nyaj Hawj