Xob pe lwm tug Vaajtswv

User Rating:  / 1

Nyob rua huv Tsivdlim 20:3 mas Vaajtswv tau saamfwm kuas tsaav tuabneeg Yixalayees tsi xob pe lwm tug vaajtswv, tabsis pe Nwg tuableeg xwb. Puas yog Vaajtswv has rua tsaav tuabneeg Yixayees xwb mas? Tsi yog. Tug Vaajtswv kws has nyob rua huv phoo Vaajlugkub Qub hab phoo Vaajlugkub Tshab yeej yog tuabtug Vaajtswv hab lu lug nuav puav leej yog has rua peb tam nuav ib yaam, rua qhov nyob huv Yuhaas 1:12 has tas, “…cov tuabneeg kws leeg yuav nwg hab ntseeg nwg; nwg pub puab muaj cai lug ua Vaajtswv cov mivnyuas.”

Peb tuabneeg tam nuav suavdlawg ua dlejnum lawv le sijhawm, lawv le caij nyoog kws tau teem tseg lawm xwb. Txug caij ua ces yuav tsum tau ua lossis yuav tsum tau moog tsi tog leejtwg le lawm. Txawm yog peb tej kws ua laj ua teb los peb yeej paub has tas yuav tau sawvntxuv moog ua teb thaus tshaav ntuj kub tuaj txug ces peb tub ua taag ntau lawm. Nyag muaj nyag ib tug agenda rua kev ua neej nyob rua huv lub nplajteb nuav. Nyag pluav nyag lub neej xaav tsi txug has tas Vaajtswv tseemceeb npaum le caag rua peb tuabneeg. Txawm yog zoo le caag los xijpeem Vaajtswv thawj thawj qhov agenda ntawm Nwg dlaim komtswj rua peb kev ua neej nyob rua huv lub nplajteb nuav yog kuas peb tsi xob moog pe lwm tug Vaajtswv, tabsis pe Nwg tuableeg xwb. Ua tuabneeg nyob yog koj ncaim kwv ncaim tij, ncaim nam ncaim txiv, ncaim phooj ncaim ywg dleb zuj zug lawm ces koj nov qaab puab zuj zug tuaj hab txujkev sis ncawg sis swm los tsuag zuj zug. Txawm yog peb ua neej nyob rua thaajchaw twg, lub teb lub chaw twg los Vaajtswv xaav kuas peb tsi xob nov qaab Vaajtswv hab yuav tsum pehawm Vaajtswv ib leeg xwb. Nwg nuav peb ib txha ntseeg tsiv moog ua twj cuab rua tej lub zog miv miv tsi muaj pawg ntseeg Hmoob lossis tej tswvcuab kws moog ua laag luam nyob dleb dleb cov pawg ntseeg ces ib txha cale tso Vaajtswv tseg, tso pawg ntseeg tseg zuj zug hab peb saib peb tej num kws peb ua tseemceeb dlua le Vaajtswv lawm ces kev ntseeg Vaajtswv hab nrug cov ntseeg sis raug zoo los cale pluj zuj zug, tsuag zuj zug moog.

Muaj ntau zag kuv tig rov qaab lug xaav txug yug tsev tuabneeg xwsle, yug ob namtxiv lub neej lossis yug tej mivnyuas; yog ib leeg tsi ncaaj rua ib leeg lossis has npaum twg los tej mivnyuas tsi paub noog yug ua nam ua txiv lug lawm ces yeej tu yug sab heev, rua qhov yeej yog yug tug txwj tug nkawm tag tag losis yeej yog yug tej mivnyuas kws yug yug quaszog txhaj le mob yug sab. Kuv ntseeg has tas yog peb tuabneeg tsi yog Vaajtswv tsim ces Nwg yeej tsi thaab mob sab hab khib peb dlaabtsi le hab, tabsis vim peb tuabneeg yog Vaajtswv ua tug tsim zoo le Vaajtswv tug yaamntxwv. Nwg yog tug kws rau sav rau paa rua peb caj sa lug ua ib leej tuabneeg nyob mas Vaajtswv txhaj le mob sab peb ua luaj. Nwg hlub peb tsi hlub los txug qhov kws Nwg tug kheej tau lug peemtsheej ua tuabneeg hab lug tuag sau tug ntoo khaublig theej peb tuabneeg tej kev txhum los peb tseem luag quas ntxhi tuav teg quas rawv nrug Dlaab Ntxwjnyoog ua neej tub tsi paub has tas tug Tswv kws tsim peb yog leejtwg tag tag. Ncu qaab ntsoov has tas vim Vaajtswv tseem mob sab Nwg txhaj le ua zaaj ua ntxeev qha. Nyob rua huv 2 Kauleethaus 6:18 qha has tas, “Kuv yuav yog mej txiv hab mej yuav yog kuv cov tub cov ntxhais. Tug Tswv kws muaj Fwjchim Luj kawg nkaus yog tug kws has le nuav.” Nub nua kuv xaav kuas peb tig rov qaab lug ncu txug peb tug kheej has tas peb yog Vaajtswv ib tug mivnyas tag tag. Txawm yog peb nyob rua thaajchaw twg, lub tebchaws twg los peb yuav tau tig peb lub sab lub ntsws rov qaab lug nrhav Vaajtswv, lug pehawm Nwg kws yog peb tug Tswv.

By: Kx. Num Nyaj Hawj

{jacomment on}