Ua Vaajtswv Tsaug

 

Ncu Ntsoov Ua Vaajtswv Tsaug

Lub thanksgiving xyoo nuav xuvxwm tau has tawm has tas tebchaws Ameskas nuav yuav noj turkey txug le 45 plhom (million) tug. Coob leej ntau tug ncu tug turkey ntau dlua le ncu Vaajtswv tej txaj ntsis kws nwg pub rua peb ua neej ib lub xyoos tim quas zoj rov qaab lug txug rua lub caij thanksgiving nuav. Feem ntau, lub caij nuav suavdlawg tau su dlej su num. Ib txha npaaj moog saib tsev tuabneeg rua kev dleb hab yog ib lub caij rua tsev tuabneeg lug nyob uake, noj uake, hab luag uake zoo sab ob peb nyuas nub kws suavdlawg tuaj sis txoos uake rua ib qhov chaw.   Peb ib txha yuav muaj phooj muaj ywg, muaj kwvtij neejtsaa tuaj nrug peb koom noj turkey ua ib ke ua kev zoo sab, tabsis ntshe muaj ib txha yuav nyob mluag mlob tu sab quaslaag vim yug tug hlub tso yug tseg lawm, vim kev mob kev nkeeg yug tseem nyob huv tsev tshuaj, lossis vim yug yog tuabneeg txomnyem tsi muaj vaajtse nyob, tsi muaj phoojywg nrug has lug.

Txawm peb yuav tug zoo le caag los xij Vaajtswv txujlug has nyob rua huv 1 Thexalunikes 5:16-18 has tas, “Mej yuav tsum najnub zoo sab. Mej yuav tsum thov Vaajtswv tsi tseg tsi tu. Txawm yog mej raug kev txomnyem hab tau zoo los mej yuav tsum ua Vaajtswv tsaug. Vaajtswv xaav kuas mej txhua tug kws nrug Tswv Yexus koom ib txujsa lawm ua tej nuav.” Kuv xaav kuas lub caij thanksgiving nuav peb yuav tau siv sijhawm lug ua Vaajtswv tsaug rua ob peb yaam lawv le nuav:

1.Ua Vaajtswv tsaug kws nwg tseem tswj lub nplajteb hab lub ntuj rua peb nyob.

2.Ua Vaajtswv tsaug kws nwg pub tshaav ntuj lug naag lug yug peb tej qoob loo peb txhaj le tau noj tau haus.

3.Ua Vaajtswv tsaug kws peb muaj Vaajtswv tuav rawv peb txujsa peb txhaj le nyob lug txug najnub nuav.

4.Ua Vaajtswv tsaug kws peb muaj tsev tuabneeg.

5.Ua Vaajtswv tsaug kws peb muaj phooj muaj ywg, muaj kwv muaj tij, hab muaj neej muaj tsaav.

6.Ua Vaajtswv tsaug rua peb pawg ntseeg hab tej thawjcoj suavdlawg.

7.Ua Vaajtswv tsaug kws peb muaj tej nom tej tswv lug tswjteb kaav chaw.

8.Ua Vaajtswv tsaug kws peb tseem muaj ib txuj dlejnum ua.

9.Ua Vaajtswv tsaug kws peb tseem muaj nyajtxag lug siv.

10.Ua Vaajtswv tsaug kws peb tseem muaj lub chaw nyob chaw nkaum tshaav nkaum naag.

11.Ua Vaajtswv tsaug kws peb tseem muajj zaub mov lug noj sau lub rooj noj mov txhua nub.

12.Ua Vaajtswv tsaug kws peb tseem tau txais txujkev ywjpheej lug pehawm Vaajtswv yaam kaajsab.

13.Ua Vaajtswv tsaug kws peb tseem muaj Vaajtswv lug ua peb lub chaw casab.

 

Peb cov kws ntseeg tug Tswv Yexus lawm ncu ntsoov has tas txawm yog peb lub neej tau zoo hab txomnyem los peb ncu ntsoov ua Vaajtswv Ntuj tsaug. Thov Vaajtswv foom koobmoov zoo rua peb suavdlawg hab thov xaa ib lu lug qhuav qhuav tuaj qha rua mej paub has tas peb Suab Xaa Moo Zoo ntawm HKM thov ua peb cov ntseeg tsaug kws mej tau paab peb ua ntu zug lug txug rua najnub nua peb txhaj le ua tau Vaajtswv teg dlejnum tsi tu ncua. Thov kuas lub caij Thanksgiving xyoo nuav suavdlawg tau txais Vaajtswv txuj koobmoov npluamag

By: Kx. Num Nyaj Hawj