Vaajtswv Tegnum

Yuav ua le caag peb txhaj paub has tas Vaajtswv hu peb lug ua Nwg tegnum?

Vaajtswv txujlug nyob huv Efexus 4:11-13 has le nuav tas, “Nwg yog tug kws pub koob moov rua tuabneeg, nwg tsaa qee leej ua timthawj, qee leej ua cov cev Vaajtswv lug, qee leej ua xwbfwb qha Txujmoo Zoo, qee leej ua cov xwbfwb qha, hab qee leej ua cov saib cov ntseeg.  Nwg ua le ntawd tub yog nwg qha kuas cov ntseeg paub ua Vaajtswv teg num, cov ntseeg kws yog Yexus Khetos lub cev txhaj le yuav txawj luj hlub zuj zug moog txug thaus peb suavdlawg ua tau ib lub sab, ntseeg ib yaam nkaus, paub tseeb Vaajtswv tug Tub, hab ua tau lub neej zoo ib yaam le Yexus Khetos.  Dlua le nuav, nyob rua huv Tegnum 6:4 tseem has ntxiv has tas, “Yog le ntawd, cov kwvtij, mej ca le xaiv xyaa leej lug rua peb, puab yuavtsum yog cov kws suavdlawg fwm, puv npo Vaaj Ntsujplig tug Dlawbhuv hab muaj tswvyim, peb yuav tsaa puab ua teg num nuav.  Peb txhaj muaj sijhawm thov Vaajtswv hab moog qha Vaajtswv txujlug."   Yeej tseeb tag kws Vaajtswv pub peb nyag muaj nyag ib yaam koobmoov, nyag txawj nyag lawm ib yaam mas Nwg txhaj hu peb lug nyob uake ua ib pawg ntseeg sub peb ib leeg txhaj paab tau ib leeg rua kev ua Vaajtswv num.  Peb ib txha tub ua Vaajtswv teg dlejnum huv pawg ntseeg ntev heev lawm tabsis peb qee leej tseem tsi totaub has tas qhov koobmoov kws Vaajtswv pub rua peb txawj lug paab pawg ntseeg nua yog dlaabtsi.  Vim le nuav thaus kws txug caij pawg ntseeg txujkev xaiv tsaa mas peb txhaj le sij pheej yig yig tsi xaav ua.  Txawm le caag los xij yuav ua le caag peb txhaj paub has tas Vaajtswv hu peb lug ua Nwg tegnum?

1.      Zoo sab hlo ca Vaajtswv siv yug.  Qhov kws Vaajtswv tsi siv koj vim rua qhov koj xaav ua teg num luj xwb.  Yog luas muab qhov nyuas yau rua koj ces koj tsi leeg ua hab tsi xaav ua.  Txawm yog koj leeg ua los koj tsuas yog leeg tso rua ntawd xwb dlejnum ib lub xyoos yeej tsi pum tshwm dlaabtsi le.  Qhov zoo tshaaj ces yog zoo sab hlo ca Vaajtswv siv koj txawm yog yuav nyam yog lub meejmom twg los cale txaus sab hlo paab le kws  paab tau.

2.     Thov Vaajtswv paab kuas yug muaj tswvyim ua nwg teg num.  Qhov kws nwg nuav peb cov ntseeg ntau pawg moog tsi taug vim peb siv peb tej tswvyim xwb tsi yog lub tswvyim kws lug sau ntuj lug.  Koj khaav koj tej kev txawj kev ntse, kuv khaav kuv kev coj noj coj ua.  Ua kuas tau meejmom hab ua rua luas qhuas yug xwb tabsis qhov tseemceeb lub tswvyim tsi yog Vaajtswv lub.  Thaus vaajntxwv Xalumoos sawv lug ua vaajntxwv coj tsaav tuabneeg Yixalayees mas nwg thov Vaajtswv kuas pub tswvyim rua nwg coj cov pejxeem Yixalayees mas Vaajtswv txhaj le txaus sab heev hab Nwg pub lub tswvyim kev txawjntse rua Xalumoos hab Nwg tseem pub yaam kws Xalumoos tsi tau thov rua nwg hab (1 Vaajntxwv 3:8-14).  Vaajtswv txujlug nyob huv Yakaunpaus 1:5 has tas tug kws tsi muaj tswvyim cale qheb ncauj lug thov ntawm tug Tswv Nwg yeej yuav pub rua tug ntawd.  Ncu ntsoov thov Vaajtswv paab kuas koj muaj tswvyim lug ua Nwg teg num.

3.     Tig lug pum txug qhov koobmoov kws koj tub muaj lawm.  Ntsuag saib koj txuj koobmoov kws paab tau Vaajtswv teg dlejnum yog dlaabtsi.  Kuv has ncaaj, yog koj tsi muaj peevxwm qha hab qhuabqha nyob rua huv pawg ntseeg ces yug tsi taag leeg lub meejmom ua txwjlaug.  Lu nuav yuav has mob zog rua qee leej tabsis nyob rua huv Tegnum 6:4 yeej has meej has tas, “Yog le ntawd, cov kwvtij, mej ca le xaiv xyaa leej lug rua peb, puab yuavtsum yog cov kws suavdlawg fwm, puv npo Vaaj Ntsujplig tug Dlawbhuv hab muaj tswvyim, peb yuav tsaa puab ua teg num nuav.  Peb txhaj muaj sijhawm thov Vaajtswv hab moog qha Vaajtswv txujlug."   Tej zag kuv txuj koobmoov yog kev hu nkauj xwb lossis txhawb lwm tug tug zug xwb.  Cale siv yaam koobmoov kws koj muaj paab Vaajtswv teg dlejnum yaam txaus sab hlo tsi xob muab zais ca.

4.      Kub sab lug thov Vaajtswv hab qha Nwg txujlug.  Peb nyam sis thaam tabsis tsi nyam thov Vaajtswv.  Peb cov thawj nyam taw teg rua luas kawm kuas peb tsi nyam moog kawm.  Yug pheej xaav has tas yug paub txaus lawm.  Tabsis tug kws Vaajtswv yuav siv lug ua Nwg teg dlejnum yeej yog tug kws kub sab lug thov Vaajtswv hab qha Nwg txujlug.

Yog peb tsi hloov peb tug cwjpwm zoo le has nuav ntshe Vaajtswv yuav siv tsi tau peb ua nwg teg dlejnum ntev ntev moog rua lawm yaav tom ntej.  Ua Vaajtswv tsaug kws nyob rua tam neej nuav peb tseem tau lug ua tug Vaajtswv hov ntawm txhua tug tswv hab tug Vaajntxwv ntawm txhua tug vaajntxwv teg dlejnum.  Nyob rua huv Efexus 6:6 has le nuav has tas, “Mej tsi xob ua num thaus cov tswv pum kuas puab qhuas mej xwb, tabsis mej yuav tsum rau sab ntso ua lawv le Vaajtswv lub sab nyam, rua qhov mej yog Yexus Khetos cov tub qhe.”  Thov Vaajtswv foom koobmoov zoo rua peb txhua tug thawjcoj suavdlawg hab ua Vaajtswv tsaug kws mej tseem ca Vaajtswv siv mej ua Nwg dlejnum.  Thov kuas peb tug Tswv Yexus tuabneeg tau koobmeej moog ib txhis le. 

 

Tug sau:  Kx. Num Nyaj Hawj