Caag Tsi Nov Xuv Zoo Le?

Nwg nuav tuabneeg tsi tshua nyam has txug xuv zoo lawm. Txawm yog muaj xuv zoo los yeej tsi has tawm, tabsis yog xuv phem tshwm qhov twg mas suavdlawg paub ceev kawg kag le. Yog peb tig lug saib nyob rua huv tej xuvxwm tsi has huv TV, xuvtoojcua, internet, hab tej ntawv xuvxwm mas yuav laug tsi nov ib qho xuv zoo le. Tsuas yog nov hab pum tej kev phem kev qas tshwm ntau zujzug tuaj xwsle, tej kev nkauj kev nraug los fuam vaam ntau zuj zug ua rua ntau khub namtxiv lossis ntau tsev tuabneeg lub neej puamtsuaj taag. Muaj tub saab tub nyag ntau zuj zug, kev tshaib kev nqhes muaj ntau zuj zug, pejxeem tawm tsaam tej nomtswv, tej tebchaws sawv sis tawm tsaam, kev sis ntaus sis tua tshwm rua ntau lub tebchaws, tej cua dlaaj cua dlub ntsawj ua vaajtse puag taag, dlej nyaab rua qhov ub qhov nua, aav qeeg moog rua ntau thaajchaw. Tej xwmtxheej kws tshwm le nuav tuabneeg nplajteb yeej tsi muaj ib lub tswvyim kws yuav lug txhim khu kuas zoo zuj zug tuaj.

Kuv muab saib tuabneeg nplajteb muaj kev txawj kev ntse ntau zuj zug tuaj tsi yog ua rua tuabneeg txawj sis hlub, sis zaam tabsis ua rua tuabneeg nyag khaav nyag txujkev txawj hab rov qaab sawv lug sis tawm tsaam. Peb yeej nov has tas muaj tshuaj zoo khu tej kaab mob tabsis zoo le tuabneeg yim muaj tshuaj khu zoo, kaab mob txawv txawv yim fuam ntau zuj zug tuaj hab xwb. Yog peb tig saib rua huv peb tej zej zog, tej moos mas tsi yog luas muab tej tsev khu mob rhuav pov tseg tabsis peb tsuas pum luas ua tsev khu mob ntau zuj zug hab luj zuj zug tuaj xwb. Yog kuv yuav muab teev ib yaam dlhau rua ib yaam mas ntshe yuav has tsi paub taag tabsis lub nplajteb nuav caag yuav tsi nov xuv zoo le. Tig lug saib Vaajtswv txujlug mas thaus lub qaab ntuj nuav yuav kawg yeej yuav muaj tej xwm tsi zoo tshwm ntau zuj zug tuaj. Nyob rua huv 2 Timautes 3:1-5 has tas, “Koj yuavtsum ncu ntsoov has tas thaus lub sijhawm kws nplajteb yuav kawg, yuav muaj kev ntxhuv sab heev, rua qhov tej tuabneeg nyag yuav xaav txug nyag xwb, puab yuav xaav tsi txug lwm tug le. Puab yuav ntshaw nyaj txag, yuav khaavtheeb, yuav muab hlub, hab yuav tsi noog namtxiv lug, tsi ris luas txaj ntsig, hab saib tsi taug Vaajtswv txujkev kevcai. Puab yuav tsi sis hlub, tsi zaamtxim rua lwm tug, nyam taug xaiv, puab tsi tswj puab lub sab, ua tuabneeg tsivtsaim hab tsi nyam ua zoo, ua tuabneeg ntxeev sab, sab heev, hab puab saib puab tsimtxaj dlua lwm tug. Puab nyam kev lomzem heev dlua nyam Vaajtswv. Puab yuav has tas, puab yog cov kws ntseeg Vaajtswv, tabsis puab yeej tsi ua lawv le Vaajtswv txuj kevcai. Koj tsi xob nrug cov tuabneeg kws zoo le ntawd.” Qhov kws peb yuav nov txuj xuv zoo ces tig peb lub sab lub ntsws rov lug rua huv Vaajtswv txujlug rua qhov:

1. Tsi muaj ib yaam zoo npaum le ua tug xaa Vaajtswv txuj moo zoo. Vaajtswv txujlug yeej has tas, “Cov tuabneeg kws moog qha Txujmoo zoo txhais kawtaw zoo kawg le (Loos 10:15).
2. Txujxuv Zoo paab tau tuabneeg rov qaab muaj lub chaw casab. “Cov tuabneeg dligmuag rov pum kev, cov tuabneeg tuag ceg moog taugkev, cov tuabneeg mob rua zoo, cov tuabneeg lag ntseg nov lug, cov tuabneeg tuag lawm sawv rov lug hab tub muaj tuabneeg moog qha Txujmoo Zoo rua cov tuabneeg txomnyem lawm” (Mathais 11:5). Nyob huv Tegnum 10:36 tseem has ntxiv has tas tug kws ntseeg Txujmoo Zoo ntawm nwg yuav tau lub neej kaajsab.
3. Txujxuv Zoo tsuas yog lug ntawm Vaajtswv lug xwb. “Tabsis tug timtswv ntawd has rua puab has tas, “Mej tsi xob ntshai! Kuv lug ntawm nuav yog coj txujmoo zoo kws yog txujkev zoo sab kawg nkaus rua txhua haiv tuabneeg lug qha rua mej paub. Nub nua mej tug Cawmseej tub yug lug rua huv Daviv lub nroog lawm, Nwg yog Khetos kws yog tug Tswv” (Lukas 2:10-11).
4. Vaajtswv Txujxuv Zoo txhaj yog txuj kws yuav nyob moog ib txhis. “Tabsis Vaajtswv txujlug yuav nyob moog ib txhis le. Txujlug nuav yog Txujmoo Zoo kws tub muaj tuabneeg muab qha rua mej paub lawm” (1 Petus 1:25).
5. Tug kws ntseeg Txujxuv Zoo ntawm yuav tau txujsa ntev dlhawv moog ib txhis. “Yog le ntawd, txhua tug kws ntseeg Nwg yuav tau txujsa ntev dlhawv moog ib txhis” (Yuhaas 3:15).

Txawm yog peb najnub nov xuv phem xuv tsi zoo xwb los peb ua Vaajtswv tsaug kws Vaajtswv tsaab ntawv kws yog Nwg txujlug tseem najnub yog Txujxuv Zoo rua nplajteb tuabneeg suavdlawg. Muaj ib lu lug has tas, “tuabneeg najnub sis ntaus sis tua, tsuas muaj Vaajtswv tuab tug txhaj tshua. Nplajteb tuabneeg najnub sis ntaus sis ntxub, tsuas muaj Vaajtswv tuabtug txhaj hlub.” Tug kws nwg txaus sab hlo nov hab txais yuav Txujxuv Zoo kws yog has txug tug Tswv Yexus tug ntawd yeej yuav muaj kev kaajsab hab tau txais txujsa ntev dlhawv moog ib txhis tsi kawg.