Nam Txujkev Hlub

Kuv nam muaj tuab saab qhov muag xwb. Kuv ntxub nwg….nwg ua rua kuv txaaj muag. Nwg yog ib tug ua zaub mov rua huv ib lub tsev kawm ntawv.

Muaj ib nub peb tawm lug uasi kuv nam lug has noj qaab nyob zoo rua kuv. Kuv txaaj muag kawg le.

Yog ua le caag nwg tseem lug tshwm nuav hab? Kuv ua txuj tsi paub nwg, kuv ntu nwg hab dlha moog rua lwm qhov lawm. Nub tom qaab kuv ib tug phoojywg lug has rua kuv has tas….”ua caag koj nam muaj ib saab qhov muag xwb?....

Kuv ntxub kuv tsi ntxub mas kuv xaav muab log kag. Ua le caag nwg tseem tsi pluj ntshis ntawm kuv lub qhov muag moog. Kuv cale moog cuag kuv nam hab has rua nwg has tas…koj xaav ua rua kuas luas luag kuv xwb nev…yog ua le caag koj tsi tuag kag moog? Kuv nam nyob tuabywv tsi teb kuv. Kuv ho tub tsi xaav txug tej lug kws tshev nwg ntawm hab, rua qhov kuv chim heev kuv yeej tsi xaav has tas yuav ua rua kuv nam tu sab le.

Kuv xaav tawm huv tsev hab tsi xaav nrug kuv nam nyob lawm. Kuv txhaj rau sab kawm ntawv hab thaus kawg kuv tau moog kawm rua txawv tebchaws. Kuv yuav quaspuj, kuv yuav tsev hab muaj miv tub mivnyuas. Kuv txaus sab hab zoo sab tej kws kuv muaj, tabsis mua jib nub kuv nam tuaj tau tuaj saib kuv. Nwg tsi tau ntsib kuv tau ntau xyoo lawm hab nwg ho rua tsi tau pum dlua nwg cov xeeb ntxwv hab. Thaus nwg sawv saab nrau zoo khob qhov rooj kuv cov mivnyuas moog qheb qhov rooj hab puab luag zum zawg. Kuv cale qw nrov nrov has tas caag kuv tub tsi tau caw koj tuaj saib kuv ua caag koj tshwm ko. Kuv cale tshev nwg hab has rua nwg has tas…”ua le caag koj tseem tuaj tshwm nuav ua rua kuv cov mivnyuas ntshai koj ua le …koj cale tsiv tawm taamsim nuav moog. Leejnam teb tuabywv has tas ….aub…thov txim tej zag kuv tuaj tau yuam kev tsev lawm xwb. Ces leejnam cale rov qaab lawm.

Muaj ib nub lub tsev kawm ntawv kws kuv kawm yaav dlhau lug tau sau ntawv tuaj nrhav cov tub ntxhais kawm ntawv yaav dlhau lug kuas moog sis ntsib ib zag ua ke. Kuv dlaag kuv quaspuj has tas kuv moog ua dlejnum rua lwm qhov lawm ces kuv txawm moog kawm lub rooj sis ntsib ntawm. Tom qaab peb rooj sis ntsib kuv ua txuj moog saib lub nyuas tsev kws kuv nam ib nyob. Thaus kuv moog txug ntawm muaj ib tug txiv neej txhaj has rua kuv has tas, “Tug quaspuj nuav tub taag sim neej lawm.” Los kuv tub tsi poob ib lub kua muag le. Nwg txhaj le cev tau ib dlaim ntawv rua kuv.

Tsaab ntawv has le nuav has tas, “Tug tub kws kuv hlub, kuv xaav txug koj txhua lub sijhawm. Thov txim kws kuv tuaj txug ntawm koj tsev hab ua rua koj cov mivnyuas ntshai. Kuv zoo sab heev kws nov has tas koj yuav tuaj rua huv tsev kawm ntawv lub rooj sis ntsib. Tabsis kuv ntshe kuv yuav sawv tsi taug sau kuv lub txaaj tuaj pum koj ib plag. Kuv thov txim kws kuv ua rua koj txaaj muag thaus kws koj luj hlub tuaj lawm. Kuas koj paub has tas thaus koj tseem yau, tsheb sis tsoo es ua rua koj ib saab qhov muag pawv lawm. Kuv, kws yog koj nam, tsi xaav ca koj luj hlub tuaj tshuav ib saab qhov muag xwb kuv txhaj le muab kuv ib saab rua koj. Kuv zoo sab heev kws kuv tug mivtub rov pum kev vim kuv saab qhov muag ntawm ko.

Kuv hlub koj taag kuv lub sab lub ntsws,

Sau npe,
Koj nam