Xob Puab Mlom Lug Pe

Nyob huv Tsivdlim 20:4 Vaajtswv tau saamfwm kuas tsaav tuabneeg Yixayees tsi xob puab tej mlom kuas zoo le tej kws nyob sau nruab ntug lossis huv nplajteb nuav lossis huv tivtxwv rua puab pe. Peb pum tau has tas ntau tsaav tuabneeg nyob rua huv lub nplajteb nuav yeej puab mlom pe. Tub tsi yog puab mlom pe xwb, tabsis lub roob twg sab lossis lub haav twg tub, tsob ntoo twg luj, hab lub pob zeb twg luj mas tuabneeg ib txha tseem moog hlawv xyaab hlawv ntawv muab fij rua dlaab huv tuabsi. Xwbfwb Paulus txhaj le has nyob rua huv Tegnum 17:23 has tas, “Thaus kuv moog ncig saib mej lub nroog hab moog saib tej chaw kws mej pe mlom, kuv pum muaj lug sau rua ntawm ib lub thaaj has tas, ‘Muab rua tug Vaajtswv Kws Peb tsi Paub.’ Tug kws mej pehawm tabsis mej tsi puab ntawd tub yog tug kws nwgnuav kuv qha rua mej ntaag. Tug Vaajtswv kws tsim lub nplajteb hab ib puas tsaavyaam kws nyob huv nplajteb nuav, tug ntawd yog tug Tswv kws kaav lub ntuj hab lub nplajteb, nwg yeej tsi nyob huv tej tsev kws tuabneeg ua. Vaajtswv tsi pluag ib yaam dlaabtsi le, nwg yeej tsi kuas leejtwg ua ib yaam dlaabtsi rua nwg. Rua qhov Vaajtswv yog tug kws rau sav rau paa rua tuabneeg, hab pub ib puas tsaav yaam rua suavdlawg. Vaajtswv tsim txhua tsaav tuabneeg tawm huv tuab tug tuabneeg roj ntshaa lug xwb, hab kuas puab moog nyob thoob plawg huv lub nplajteb. Vaajtswv tu tebchaws rua puab hab teem sijhawm kuas puab nyob ntev le caag. Vaajtswv ua le ntawd kuas puab txhaj le lug nrhav Vaajtswv. Yog puab kub sab lug xaav paub Vaajtswv, puab yeej yuav paub nwg, rua qhov Vaajtswv yeej nyob tsi dleb ntawm peb txhua tug.” Peb najnub nrhav txhua txujkev kuas peb paub dlaab ntxwjnyoog hab peb paub rov moog cuag kuas tau puj tau yawm, tabsis peb tsi kaam lug nrhav txujkev tseeb hab paub tug Vaajtswv kws yog tug tsim peb tuabneeg hab tsim lub nplajteb hab lub ntuj. Yog vim le caag Vaajtswv txhaj le saamfwm kuas tuabneeg xob puab mlom pe, tsi has tej kws nyob sau nruab ntug lossis huv nplajteb nuav lossis huv tivtxwv?

1. Rua qhov tsi muaj ib tug luj dlua Vaajtswv lawm. Vaajntxwv Xalumoos has nyob rua huv 2 Xwmtxheej Vaajntxwv 2:5-6 has tas, “Kuv npaaj ua ib lub Tuamtsev kws zoo heev, rua qhov peb tug Vaajtswv yog tug kws muaj fwjchim luj dlua tej vaajtswv huv tuabsi. Nyob huv Ntawv Nkauj 135:5-6 tseem has ntxiv has tas, “Kuv paub has tas, peb tug Tswv yog tug muaj fwjchim luj, nwg muaj fwjchim dlua tej vaajtswv huv tuabsi. Nwg ua tau txhua yaam lawv le nwg lub sab nyam, tsi has sau ntuj hab huv nplajteb nuav, huv havtxwv lossis huv nruab tivtxwv qhov kws tub heev.”
2. Rua qhov Vaajtswv cov mivnyuas tsi xob puab txoov dlaab pe. Nyob huv 1 Yuhaas 5:21 qha has tas, “Cov mivnyuas, mej yuavtsum ceefaaj, mej tsi xob pe dlaab pe mlom.” Xwbfwb Paulus tseem has ntxiv has tas, “Yog le ntawd cov phoojywg kws kuv hlub, mej tsi xob moog nrug luas pe dlaab pe mlom. Kuv has rua mej ib yaam le has rua cov tuabneeg kws paub qaabhau; mej cale khaws kuv tej lug coj moog ua tuab zoo xaav.”
3. Rua qhov tej mlom kws tuabneeg pe tsuas yog tuabneeg txhais teg puab xwb. Yog peb muab ua tuab zoo xaav mas Vaajtswv txujlug yeej has meej heev rua peb nyob rua huv Ntawv Nkauj 115:4-8 yeej qha has tas, “Puab tej mlom yog muab nyaj hab kub nchuav, tej ntawd puavleej yog tuabneeg txhais teg ua xwb. Tej mlom ntawd muaj qhovncauj, tabsis has tsi tau lug, muaj qhovmuag tabsis tsi pum kev, muaj qhovntsej, tabsis tsi nov lug, muaj qhovntswg, tabsis tsi nov ntxhab. Muaj teg, tabsis tsi txawj kov dlaabtsi, muaj kutaw, tabsis tsi txawj rhais ruam. Tej mlom ntawd ua tsi tau suab nrov huv qaa tuaj. Cov tuabneeg kws nchuav mlom hab ca sab rua tej mlom ntawd puab zoo le tej mlom kws puab nchuav ntawd ntaag.” Vim le caag peb cov ntseeg Tswv Yexus lawm txhaj le tsi puab Tswv Yexus pe? Rua qhov Yuhaas 4:24 yeej has meej has tas, “Vaajtswv yog Ntsujplig, cov kws pehawm Vaajtswv yuavtsum pehawm ntawm saab ntsujplig hab qhov tseeb.” Tug Vaajtswv kws peb pe nuav yog tug Vaajtswv kws caj sa, yog tug kws yuav nyob moog taag ib txhab ib txhis. Nyob huv Ntawv Nkauj 90:1-2 has le nuav has tas, “Tug Tswv, koj yeej ibtxwm yog peb lub chaw nyob. Thaus koj tsi tau tsim lub nplajteb hab tej toj roob hauv peg, koj yeej muaj nyob lug lawm, hab koj yeej yog Vaajtswv moog ib txhis le.”
4. Rua qhov Vaajtswv yuav rau txim rua tug kws pe dlaab pe mlom. Nyob huv Yaxayas 44:9-11 has le nuav has tas, “Cov tuabneeg kws puab mlom, yeej tsi tseemceeb hab tej vaajtswv kws puab fwm tsi muaj nqes dlaabtsi. Cov tuabneeg kws pe tej vaajtswv nuav yog tuabneeg dligmuag hab tsi paub qaabhau, puab yuav raug kev txaajmuag. Qhov kws tuabneeg nchuav mlom nyaj mlom kub lug pe, tsi muaj qaabhau dlaabtsi le. Txhua tug kws pe mlom yuav raug kev txaajmuag; cov tuabneeg kws puab mlom; puab yog tuabneeg xwb, tsi muaj nqes dlaabtsi. Ca le tso puab lug rua ntawm lub rooj txavtxim, puab yuav ntshai hab txaajmuag heev.” Tub tsi yog tug kws pe dlaab pe mlom xwb tabsis huv 1 Kauleethaus 6:9-10 tseem has ntxiv has tas, “….cov tuabneeg kws nyam ua kev nkauj kev nraug, pe mlom, ntxag luas quaspuj luas quasyawg, txivneej ntxag txivneej, quaspuj ntxag quaspuj, ua tubsaab, ntshaw luas tug, quav cawv, thuam lwm tug hab txhaav luas tug. Cov tuabneeg ntawd yuav tsi muaj feem moog nyob Vaajtswv lub Tebchaws le.”

Thaus xaus nuav, kuv xaav kuas peb tig rov qaab lug tshuaj peb lub neej saib peb has tas peb yog ib tug ntseeg Tswv Yexus nua peb ncaajnceeg rua peb tug Tswv npaum le caag lawm? Puas muaj dlaabtsi ntawm peb lub neej kws peb tseem ca sab tshaaj peb tug Vaajtswv? Peb yeej lawb tug xwmkaab saab nqaj tawv lawm tabsis ntshe peb tseem tshuav tug xwmkaab saab ntsujplig peb tsi tau muab hlawv povtseg. Yog peb lub sab kub lug xaav nrhav hab xaav paub Vaajtswv Nwg yeej yuav ca peb nrhav tau hab paub nwg xwb. Yog nub nua peb lub sab txaav dleb ntawm Vaajtswv lawm cale lug thov Vaajtswv zaam peb tej kev txhum hab tig peb lub xubndlag rov lug pehawm Nwg, qhuas Nwg, hlub Nwg, hab lug txais yuav Nwg lug ua peb tug Tswv Cawmseej Vaajtswv lub Ntuj Ceebtsheej peb txhaj le yuav muaj feem tau lug ua peb tug tag.

By: Kx. Num Nyaj Hawj