Pum Caws Plav Saab Nrau

Peb ua tuabneeg nyob peb nyag yeej muaj nyag ib cov caws plav saab nrau kws ua rua luas pum. Tej caws plav ntawd tej zag yuav yog koj qaug to, ua rag raug, kub nyab, raug phais, txhaaj tshuaj voog, hab tawm ntxau rua tej ntsejmuag lossis lwm yaam. Muaj tej lub caws plav kuj luj tabsis muaj tej lub caws plav kuj miv. Tej cov tuabneeg kws kub nyab ntau mas ua rua puab lub cev hab tej ntsejmuag muaj caws plav tsi tshua zoo nkauj zoo nraug lawm. Yaam caws plav kws nyob saab nrau mas feem ntau yeej khu tsi tau kuas rov zoo le qub. Tej kws tshuaj nwg nuav puab kuj muab tej caws plav hlais hab khu dlua tshab los yeej tsi zoo le tej nqaj qub lawm. Nuav yog peb muaj peevxwm pum tej caws plav saab nrau ntawm peb cev nqaj dlaim tawv.

Muaj dlua iblub caws plav kws nyob rua huv peb saab nruab nrog. Lub nuav peb tsi muaj leejtwg yuav muaj cuabkaav pum tau. Txawm yog lub luj lub miv los koj tsi muaj cuabkaav pum tau kuv le hab kuv tsi muaj cuabkaav pum tau koj le. Lub caws plav kws kuv has nuav ntshe peb coob leej yuav muaj tabsis tsi pum qaab yuav qha rua leejtwg. Koj lub caws plav kws nyob rua saab nruab nrog ntshe yuav yog txujkev sis nrauj, txujkev ua ntsoj ua ntsuag, txujkev muaj mob kev nkeeg, txujkev raug luas txob luas thuam, txujkev txomnyem nyuajsab. Tej nuav mas peb zais quas ntshi tsi qha rua leejtwg paub. Muaj ntau zag peb xaav khu peb lub caws plav nuav kuas loos tabsis tsuas muaj voog hab kaam paug mob luj zuj zug tuaj xwb. Nub nua kuv qha rua koj paub has tas koj tseem muaj kev casab kws yuav khu tau koj lub caws plav ntawm ko.

Muaj caws plav ntawm saab nqaj tawv mas tsi mob ua luaj twg, tabsis yog muaj caws plav ntawm saab sab ntsws huv nruab nrog kws nkaag tau rua yug tej kev xaav mas mob yug lub sab kawg nkaus le. Ua rua yug ua tau lub neej najnub nyob nyuajsab, txaajmuag, hab ntau lub sijhawm yug xaav tuag. Txawm yog tej mob ntawd tub zoo hab hloov ua caws plav lawm los tej lub sijhawm tseem rov qaab o o hab zoo le yuav rov qaab kaam paug tuaj. Nub nua txawm yog koj yuav muaj lub caws plav luj npaum le caag nyob rua huv koj saab sab ntsws lawm los Tswv Yexus muaj peevxwm yuav khu tau hab zaam tau koj lub txim yog has tas koj lug leeg hab txais yuav Tswv Yexus ua koj tug Tswv Cawmseej. Kx. Paulus tau has le nuav nyob rua huv Kalatias 6:17 has tas, “Txij nuav moog, tsi xob pub leejtwg tuaj ua rua kuv nyuaj sab dlua lawm, rua qhov kuv lub cev kws muaj caws plav tub ua rua suavdlawg pum lawm has tas kuv yog Yexus Khetos tug tubqhe.” Tswv Yexus lub caws plav ntawm Nwg ob saab teg hab ntawm Nwg ib saab phaab taav tub muaj peevxwm zaam tau tug tub saab ntawm Tswv Yexus ib saab; tub zaam tau tug nam ndlav kws cov Falixais muab nteg coj tuaj kom Tswv Yexus; tub zaam tau Petus kws yog Tswv Yexus ib tug thwjtim tsi leeg paub Nwg txug peb zag; tub zaam tau rua Paulaus tug kws tsimtxom cov ntseeg Tswv Yexus; hab tub zaam tau nplajteb tuabneeg lub txim. Nyob huv Yaxayas 53:5 has le nuav tas, “ Tub yog vim peb tej kev txhum, nwg txhaj raug nqaj ndluag ntshaav nrug, tub yog vim tej kev phem kws peb ua, nwg txhaj raug nplawm. Qhov kws nwg raug txim txomnyem ntsuav, yog paab kuas peb tau nyob kaaj sab lug, nwg raug nplawm tub yog khu kuas peb tej kev mob kev nkeeg zoo.” Yog le, txawm yog koj lub caws plav yuav voog luj npaum le caag los Tswv Yexus muaj peevxwm khu tau hab paab kuas rov zoo le qub hab Nwg yuav zaam tau koj lub txim. Cale txaav lug cuag Tswv Yexus nub nua.

Tug sau: Kx. Num Nyaj Hawj