Nyob Zoo Xyoo Tshab

Tsi nwm xwb tub rov qaab txug lub xyoo tshab lawm tag. Tig saib lub neej yaav dlhau lug peb tub ua tsi muaj pistsawg yaam, tabsis tub ho xaus xyoo. Txawm le caag los Suab Xaa Moo Zoo ntawm HKM thov ua peb ib tsoom ntseeg tsaug kws vim muaj mej txujkev paab nyaj txag, paab tswvyim, hab paab thov Vaajtswv rua saab xuvtoojcua peb txhaj le ua tau Vaajtswv teg dlejnum ib lub xyoos puv ntoob tsi muaj teebmeem dlaabtsi. Thov has ib lu lug qhuav qhuav tuaj qha rua mej suavdlawg paub has tas ua Vaajtswv tsaug hab ua mej suavdlawg tsaug.

Ib qho xuv zoo xaa tuaj qha pub rua peb ib tsoom ntseeg suavdlawg paub has tas lub xyoo tshab nuav peb Suab Xaa Moo Zoo ntawm HKM tseem yuav ntxiv 30 feeb ntxiv rov rua yaav tsaus ntuj, sijhawm thaus 6:30-7:00 pm lawv le lub sijhawm nyob rua tebchaws Lostsuas, nyob rua Suavteb sijhawm yog 7:30 – 8:00 pm, huas nyob rua saab Maaj teb yog 6:00 – 6:30 pm. Peb yuav has tawm nyob rua shortwave radio (SW) , qhov frequency 11780 kHz kws yog band meter 25. Yog leejtwg ho muaj tej kwvtij neejtsaa nyob saab ntuj nrau los has qha rua puab tau qheb noog hab.   Tej dlejnum kws peb npaaj sab ua rua xyoo 2012 nuav los yeej tseem vaam hab casab ntsoov rua peb cov ntseeg txujkev paab hab kev thov Vaajtswv paab peb. Thov mej tsi xob nov qaab Suab Xaa Moo Zoo ntawm HKM rua mej txujkev thov Vaajtswv.